धान हाल्यो– भुस निकाल्छ
तोरी हाल्यो– पिना निकाल्छ
उल्टो मेसिन, खराब मेसिन ।
बगैँचा दियो– खोरिया बनाउँछ
फूल दियो– बनमारा उमार्छ
माटो राख्यो– खरानी निकाल्छ
उल्टो मेसिन, बिग्रिएको मेसिन ।
सुन दियो– पत्रु निकाल्छ
योद्धा दियो– कारिन्दा बनाउँछ
जनता दियो– दास बनाउँछ
सपना दियो– लास बनाउँछ
उल्टो मेसिन, पत्रु मेसिन ।
बुद्ध दियो– हिटलर जन्माउँछ
माक्र्स दियो– ख्रुस्चोभ र देङ बनाउँछ
लेनिन र माओ दियो– पुष्पकमल र नेत्रविक्रम नै बनाइदिन्छ
सडेको मेसिन, कुहिएको मेसिन ।
यो अजिङ्गर हो– सुन्दर सपनाहरू निल्ने
यो ब्ल्याक होल हो– कालजयी आदर्शहरू समाप्त पार्ने
रूप, रङ, स्वाद
आदर्श, विचार, निष्ठा
सबैसबै स्वाहा पार्ने
यो दलाल पुँजीवादी अक्टोपस
यो साम्राज्यवादको कनिष्ठ र पत्रु संस्करण
यो मर्मत गर्नै नमिल्ने कबाडी मेसिन ।
अवज्ञा गरौँ यो सिसिफस यात्रा
बहिष्कार गरौँ यो आफैँलाई लिलाममा राख्ने बोलकबोलको जात्रा
र निर्माण गरौँ नयाँ मेसिन
जसले सगरमाथाको यात्रा गर्दा
सगरमाथा नै पुर्याउँछ, दिल्ली र वासिङ्टन पुर्याउँदैन
तय गरौँ हाम्रा
चिहानबाट ब्युँतिएका सुन्दर सपनाहरूको यात्रा ।
