काठमाडौँ : अखिल नेपाल जनसांस्कृतिक महासङ्घले नेपालको सार्वभौमिकतामाथि गम्भीर आँच पुर्याउने राष्ट्रघाती ‘इम्बोस्ड नम्बर प्लेट’ खारेज गर्न माग गरेको छ ।
अखिल नेपाल जनसांस्कृतिक महासङ्घका महासचिव खेम थपलियाले बिहीबार एक प्रेस विज्ञप्ति जारी गरी ट्राफिक र यात्रुहरूको हितरक्षासँग सरोकार राख्ने नम्बर प्लेटमा नेपाली भाषाको वर्णाक्षर र अङ्क पर्याप्त हुँदाहुँदै पनि आत्मघाती ‘इम्बोस्ड नम्बर प्लेट’ प्रयोग गरिनु नेपाली जनताको नैसर्गिक भाषिक र गोपनीयताको हकको गम्भीर हनन् हुने भन्दै साम्राज्यवादी योजनामा ल्याइएको ‘इम्बोस्ड नम्बर’ तत्काल खारेज गर्न माग गरे ।
तथाकथित सरल र प्रविधिमैत्रीको आबरणमा नेपाल र नेपाली जनताको अस्तित्व समाप्त पार्ने यसप्रकारको साम्राज्यवादी नीति कुनै पनि हालतमा स्वीकार्य नहुने विज्ञप्तिमा चेतावनी दिइएको छ ।
विज्ञप्तिमा लेखिएको छ, –‘आधुनिक प्रविधिबाट विश्वका अन्य देशले चौतर्फी प्रभाव विस्तार गर्ने तर त्यही प्रविधिको आवरणमा हामी नेपालीहरूलाई खुम्च्याउने यो भयानक षड्यन्त्र हो । नेपालको दलाल संसदीय सत्ताले नेपाल र नेपाली जनताको सार्वभौम अस्तित्वमाथि दिनदहाडै धावा बोल्दै अघि सारेको आत्मघाती, जनघाती तथा राष्ट्रघाती ‘इम्बोस्ड नम्बर प्लेट’ को विरुद्ध हाम्रो सङ्गठन सबै प्रकारको सङ्घर्षको विधि अपनाउन तयार छ ।’
अखिल नेपाल जनसांस्कृतिक महासङ्घ राष्ट्रियता र जनपक्षीय कला–साहित्यको पक्षमा लामो समयदेखि कठोर सङ्घर्ष गर्दै आएको भन्दै विज्ञप्तिमा भनिएको छ, –‘नेपालको राष्ट्रियता, कला, भाषा, साहित्यको रक्षा, विकास र विस्तारमा हाम्रो सङ्गठन निरन्तर क्रियाशील छ । यसर्थ, ‘इम्बोस्ड नम्बर प्लेट’ जस्तो भाषाघाती तथा राष्ट्रघाती निर्णयका विरुद्ध सशक्त आन्दोलनमा उत्रिन देशभक्त, प्रगतिशील, क्रान्तिकारी, कलाकार, वकिल, बुद्धिजीवी, लेखक–साहित्यकार एवम् सम्पूर्ण जनसमुदायमा हाम्रो सङ्गठन हार्दिक अपिल गर्दछ ।’ विज्ञप्तिको पूर्णपाठ…
