प्युठानः नेपाल कम्युनिष्ट पार्टी निकट पेशागत संगठन अखिल नेपाल शिक्षक संगठन प्युठानको पाँचौ जिल्ला सम्मेलन सम्पन्न भएको छ ।
शनिबार सम्पन्न सम्मेलनलाई सम्बोधन गर्दै कार्यक्रमका प्रमुख अतिथि तथा अखिल नेपाल शिक्षक संगठन का वरिष्ठ केन्द्रीय उपाध्यक्ष लक्षिराम ढकालले नेपालको माटो सुहाउँदो, प्राविधिक, व्यवहारिक तथा वैज्ञानिक र निःशुल्क शिक्षा प्रणाली आजको अनिवार्य आवश्यकता रहेको बताएका छन् । उनले राज्यसत्ताको आधार परिवर्तन नगरी उपरीसंरचना परिवर्तन नहुने भन्दै राज्यसत्ताको आधार र उपरीसंरचनामा परिवर्तन नगरेसम्म शिक्षामा आमूल परिवर्तन सम्भव नरहेको बताए । शिक्षालाई निजिकरण र व्यापारीकरणबाट मुक्त गरी राज्यको दायित्व र जनताको अधिकारको रुपमा हुनुपर्ने कुरामा उनले जोड दिए । कार्यक्रममा नेपाल कम्युनिस्ट पार्टीका केन्द्रीय सदस्य तथा प्युठान जिल्ला इन्चार्ज दल बहादुर खत्री जागृतिले वर्तमान शिक्षा प्रणाली हुँदाखानेको नभई हुनेखानेको पक्षमा रहेकोले शिक्षामा आमूल परिवर्तन आवश्यक रहेको बताए ।
कार्यक्रममा संगठनका केन्द्रीय सचिवालय सदस्य तथा लुम्बिनी प्रदेश अध्यक्ष नारायण भण्डारीले वर्तमान समयमा सरकारले नै शिक्षकलाई विभेद गरेको बताएका छन् । विभेद र सबैखाले शैक्षिक विकृतिका विरुद्ध संगठन खरो रुपमा उत्रनु पर्ने उनले बताए । कार्यक्रममा नेकपा प्युठानका पूर्व इन्चार्ज सुर्यप्रकाश, संगठनका केन्द्रीय सदस्य तथा रोल्पा , प्युठानका इन्चार्ज बिरवल वली र गुल्मी, अर्घाखाँची इन्चार्ज लक्ष्मण वली, अखिल (क्रान्तिकारी) का केन्द्रीय सदस्य प्रदिप कवर लगायतले सम्मेलन सफलताको शुभकामना मन्तव्य राखेको थिए ।
सम्मेलनले शिव बहादुर थापाको अध्यक्षतामा ४ जनापछि थप्नेगरी १७ सदस्यीय अखिल नेपाल शिक्षक संगठन जिल्ला समिति प्युठान निर्वाचित गरेको छ । जसको उपाध्यक्षमा एगम सुनार, महिला उपाध्यक्ष टीका गिरी सुशिला, सचिव बोम बहादुर राँहु, सह सचिव एलिना सेन र मदन अधिकारी, कोषाध्यक्ष अमृत सुनार त्यस्तै सदस्यहरुमा कमला घर्ती, मुम बहादुर पुन, मान बहादुर केसी, सञ्जय अधिकारी लगायत रहेका छन् ।
कार्यक्रमको स्वागत मन्तव्य एगम सुनार र संचालन बोम बहादुर राँहुले गरेका थिए ।