दाङः नेपाल कम्युनिस्ट पार्टी निकट जनपत्रकार संगठन नेपाल जिल्ला समिति दाङको दोस्रो बैठक सम्पन्न भएको छ ।संगठनको शनिबार बसेको बैठकले माघ ११, १२ र १३ गते लुम्बिनी प्रदेशको बुटवलमा हुने चौथो राष्ट्रिय सम्मेलनलाई भव्य बनाउने निर्णय गरेको छ ।
यस्तै बैठकले जिल्लामा आधारभूत जनपत्रकारिता तालिम गर्ने, जिल्ला स्तरीय अन्तरक्रिया कार्यक्रम गर्ने, श्रमजीवी पत्रकारको न्यूनतम पारिश्रमिक अनिवार्य कार्यान्वयन गर्न र पत्रकारहरुको पेशागत तथा भौतिक सुरक्षाको प्रत्याभूति हुने खालको वातावरण सिर्जना गर्न आग्रह गर्दै पत्रकार महासंघ र सम्बन्धित मन्त्रालयमा जिल्ला प्रशासन र पत्रकार महासंघ जिल्ला शाखामार्फत ज्ञापनपत्र बुझाउने लागएतका निर्णय गरेको छ ।
बैठकमा प्रशिक्षणात्मक मन्तव्य राख्दै प्रमुख अतिथि नेकपा दाङका सेक्रेटरी प्रदिपले बुर्जुवा पत्रकारहरु क्रान्ति विरुद्ध सशक्त ढंगले परिचालित भएको बताए । नेपाली जनताको परिवर्तनको आकांक्षाका विरुद्ध सुनियोजित प्रकारले दलाल सत्ताको रक्षार्थ उभिएका ठुला भनाउदा मिडियाहरुका भ्रामक, तथ्यहिन समाचारको प्रतिरोध गर्न जनपत्रकारहरुलाई नेता प्रदिपको आग्रह थियो । दलाल पुजीवादी सत्ता चरम संकटमा परेकाले अहिले आफ्नो सत्ता टिकाउन केही मिडिया हाउसहरुको सहारा लिएको उनले स्पष्ट पारे ।
एक फरक प्रसंगमा नेता प्रदिपले एकीकृत जनक्रान्ति सफल हुने जिकिर गरे । उनले भने, `हामीले जनता र राष्ट्रको मुक्तिका लागि एकीकृत जनक्रान्तिमार्फत वैज्ञानिक समाजवाद स्थापनाको लागि संघर्ष गरिरहेका छौं, हामी जनताको पक्षमा छौं त्यसैले हामी जित्छौ ।`
उनले आफ्नो पार्टीले जनताको मतमार्फत व्यवस्था परिवर्तन गर्छौ भन्दा केही मान्छेहरु अत्तालिएको समेत बताए । आफुलाई भयंकर लोकतान्त्रिक भनेर भ्रम फिज्नेहरु नै लोकतान्त्रिक प्रयोग जनमतसंग्रह मार्फत व्यवस्था चुन्ने अधिकार जनतालाई दिउँ भन्दा किन आत्तिएको? नेता प्रदिपले प्रश्न गरे ।
जनपत्रकार संगठन नेपाल दाङका अध्यक्ष हेमन्त प्रकाशको संचालन तथा अध्यक्षतामा बसेको बैठकमा मगर मुक्ती मोर्चा नेपालका केन्द्रीय सदस्य सिबेन्द्रको समेत आतिथ्य रहेको थियो ।
यस्तै शनिबार नेकपा निकट अखिल नेपाल महिला संघ क्रान्तिकारी दाङ जिल्ला सम्मेलन आयोजक कमिटीको दोस्रो बैठक सम्पन्न भएको संगठनले जनाएको छ । बैठकले संगठनको जिल्ला अन्तर्गतका पालिकामा सम्मेलन गर्ने तथा संगठनको दाङ जिल्ला सम्मेलन गर्ने लगायतका निर्णय गरेको छ ।