काठमाडौँ : संसारभर कोरोना भाइरस सङ्क्रमणबाट ११ लाख ७८ हजार ५२७ जनाको ज्यान गएको छ । कोरोना सङ्क्रमण सुरु भएको १० महिनामा विश्वभर ४ करोड ४७ लाखभन्दा बढी मानिसमा सङ्क्रमित भएको वर्ल्डोमिटर्सले जनाएको छ ।
वर्ल्डोमिटर्सले दिएको जानकारीअनुसार पछिल्लो २४ घन्टामा विश्वभर ५ लाख २ हजारभन्दा बढी मानिसमा कोरोना सङ्क्रमण भएको छ । योसँगै सङ्क्रमितको सङ्ख्या ४ करोड ४७ लाख ३९ हजार ९१७ पुगेको र त्यसमध्ये ८१ हजार १६६ जना सङ्क्रमितको अवस्था गम्भीर रहेको समाचारमा जनाइएको छ ।
समाचारअनुसार गएको २४ घन्टामा ७ हजार १०४ जनाको कोरोना सङ्क्रमणका कारण मृत्यु भएको छ । योसँगै विश्वभर कोरोनाले मृत्यु हुनेको सङ्ख्या ११ लाख ७८ हजार ५२७ पुगेको छ । विश्वभर सक्रिय सङ्क्रमितको सङ्ख्या १ करोड ८५ लाख ३ नाघेको र पछिल्लो २४ घन्टामा २ लाख ६५ हजारभन्दा धेरै निको भएर घर फर्किएको पनि समाचारमा उल्लेख छ ।
सबैभन्दा धेरै सङ्क्रमित भएको अमेरिकामा ९१ लाख १८ हजारभन्दा बढीमा सङ्क्रमण पुष्टि भएको छ । दोस्रो धेरै सङ्क्रमण भएको मुलुक भारतमा सङ्क्रमित सङ्ख्या ८० लाख नाघेको छ । यस्तै ब्राजिलमा सङ्क्रमित सङ्ख्या ५४ लाख ६९ हजार पुगेको छ ।
कोरोना भाइरसको सङ्क्रमणबाट युरोपेली मुलुकहरूमा २ लाख ५७ हजार ४५४ जनाको मृत्यु भएको छ ।