इलामः नेपाल कम्युनिस्ट पार्टी निकट युवा सङ्गठन नेपालको “जनमत सङ्ग्रहका लागि सङ्गठन सुदृढ तथा विस्तार अभियान” अन्तर्गत २ महिनाको अभियानमा इलाम र झापामा के्िरद्रत अभियान टिम नं. २ ले अभियानको प्रारम्भमा इलामको चुलाचुली गाउँपालिकामा सङ्गठन सुदृढ तथा विस्तार र भित्तेलेखन गतिविधिलाई तीव्र पारेको छ ।
पुस १२ गते साँझ चुलाचुली प्रवेश गरेको अभियान टिमले १३ र १४ गतेभित्र चारवटा वडामा सङ्गठन निर्माण गरेको छ भने ७० भन्दा बढी भित्तेलेखन गरेको छ ।
सङ्गठन निर्माणको क्रममा चुलाचुली वडा नं. १ मा अरुण पाण्डेको अध्यक्षतामा ११ सदस्यीय वडा समिति, वडा नं. २ मा निर्मला कुमालको अध्यक्षतामा ७ सदस्यीय वडा समिति, वडा नं. ३ मा राम राईको अध्यक्षतामा ९ सदस्यीय वडा समिति र वडा नं. ५ मा सुरज लिम्बुको अध्यक्षतामा २६ सदस्यीय वडा समिति निर्माण गरेको अभियान टिम नम्बर २ का कमान्डर तथा युवा सङ्गठन नेपालका केन्द्रीय सचिवालय सदस्य विष्णु जिसीले जानकारी दिए ।
हिजो बिहीबारसम्म चुलाचुली गाउँपालिकामा रहेर जिल्लाको माइ नगरपालिका प्रस्थान गरेको अभियान टिमले चुलाचुली गाउँपालिकाको आइतबारे बजारमा कोणसभा कार्यक्रम समेत सम्पन्न गरेको थियो । उक्त कोणसभालाई नेकपा इलामका जिल्ला सचिव मौसम र अभियान टिमका प्रमुख विष्णु जिसी ‘दीप’ले सम्बोधन गरेका थिए ।
