दमौलीः जनपत्रकार संगठन नेपाल तनहुँ जिल्लाको भेला सदरमुकाम दमौलीमा नेकपाको पार्टी कार्यालय हलमा सम्पन्न भएको छ । उक्त कार्यक्रममा प्रमुख अतिथि नेकपाका तनहुँ जिल्ला इन्चार्ज उभार, विशेष अतिथि जनपत्रकार संगठन नेपालका राष्ट्रिय सम्मेलन आयोजक समितिका केन्द्रीय सदस्य केबि गाउँले, जिल्ला सेक्रेटेरी एटम, अखिल (क्रान्तिकारी) का केन्द्रीय सदस्य पदम विक लगायतको आतिथ्यता रहेको थियो ।
जिल्ला भेलाबाट ७ सदस्यीय जनपत्रकार संगठन तनहुँ जिल्ला समिति चयन भएको । जसको अध्यक्षमा विकास भुसाल चयन भएका छ्न् ।
संगठनको केन्द्रीय सर्कुलर वाचन गर्दै आगामी माघ महिनाको ११, १२ र १३ गते बुटवलमा जनपत्रकारको राष्ट्रिय सम्मेलन हुने भएको हुँदा सो कार्यक्रमबारे जानकारी दिदै केन्द्रीय सदस्य केबी गाउँलेले आफ्नो भनाई राखेका थिए । जनपत्रकार संगठनका नीति तथा काम, कर्तव्य र अधिकार विषयमा केन्द्रीत हुँदै प्रशिक्षण दिएका थिए । साथै एमसीसीका बारे भन्डाफोर गर्न पत्रकारलाई निर्देशन दिदै उनले मुलुकलाई वैदेशिक हस्तक्षेपबाट बचाउन सबै एक भएर लाग्नु पर्ने बेला आएको बताए ।
नेपालको राजनीति र वर्तमान परिस्थितिबारे जानकारी गराउदै नवनिर्वाचित पत्रकारलाई नेकपाका जिल्ला इन्चार्ज उभारले राजनीतिक रुपमा वैज्ञानिक समाजवादबारे र नेकपाले गर्ने भनेको जनमत सङ्ग्रहका विषयमा जानकारी दिदै पत्रकारहरुले अब रास्ट्रघाती एमसीसीका विषयमा कलम चलाउन आग्रह गरे । पत्रकार मोर्चा अरु मोर्चा भन्दा फरक त बुद्धिजीवि भएकाले यसको भूमिका निकै महत्वपूर्ण भएको उनको भनाई छ ।
कार्यक्रमको अध्यक्षता विकास भुसालले गरेका थिए भने सदास शिवशंकरले भेला कार्यक्रमको सञ्चालन गरेका थिए ।
