झापाः नेपाल कम्युनिस्ट पार्टी झापा अन्तर्गत शिवसताक्षी नगरपालिकाको नगर भेला भव्य रूपमा सम्पन्न भएको छ । पार्टीका केन्द्रिय सदस्य तथा झापा जिल्ला इन्चार्ज सुमन लिम्बुको प्रमुख आतिथ्यता रहेको उक्त कार्यक्रममा झापा जिल्ला सचिव प्रशान्त, जिल्ला कार्यलय सचिव संजय लगायतको आतिथ्यता रहेको थियो ।
नगर इन्चार्ज युद्धको अध्यक्षता तथा संजय राईले सञ्चालन गरेको उक्त कार्यक्रममा सम्बोधन गर्दै कार्यक्रमका प्रमुख अतिथि एवम् जिल्ला इन्चार्ज सुमन लिम्बुले नेपालको राजनीतिक इतिहास र समयअनुसार पार्टी छान्ने जनताको अधिकार रहेको उल्लेख गर्दै अबको सही नेतृत्व र सिद्धान्त बोकेको पार्टी नेपाल कम्युनिस्ट पार्टी रहेको उल्लेख गर्दै अब सबै जनता नेकपामा समाहित हुनुपर्ने उल्लेख गरे ।
नेता लिम्बूले २००७ सालमा राणाशासनका विरूद्व लडेको काङ्ग्रेस ठिक रहेको , २०३६ सालमा पञ्चायती विरूद्व लडेको एमाले ठिक रहेको, २०५२, ६२ र ६३ मा सामन्ती राजसंस्था र संसदीय व्यवस्थाको विकल्प खोजेको माओवादी ठिक रहेको उल्लेख गर्दै अहिले दलाल संसदीय व्यवस्थाका विरूद्व संघर्ष गरिरहेको नेकपा ठिक रहेको बताए ।
त्यस्तै कार्यक्रममा बोल्दै जिल्ला सचिव प्रशान्तले अबको क्रान्तिमा युवाको विशेष भूमिका रहने बताउँदै दलाल पुजीवादीहरूका विरूद्व आम युवा, विद्यार्थी र श्रमजीवी जनता एक भएर लड्नुपर्ने उल्लेख गरे ।
सम्पन्न नगर भेलाले युद्धको नेतृत्वमा १६ सदस्यीय नगर कमिटी गठन भएको छ ।