काठमाडौँः तीन वर्ष पहिले बलात्कार पछि हत्या गरिएकी कञ्चनपुरकी किशोरी निर्मला पन्तको अभियुक्तलाई सार्वजनिक गर्न माग गर्दै अखिल (क्रान्तिकारी) ले काठमाडौँमा प्रदर्शन गरेको छ । निर्मला पन्तको दोषीलाई तत्काल सार्वजनिक गरी कार्वाही गर्न माग गर्दै आज काठमाडौँमा अखिल (क्रान्तिकारी) ले प्रदर्शन गरेको हो ।
अखिल (क्रान्तिकारी) द्वारा आज माइतीघर मण्डलामा आयोजित कार्यक्रममा सहभागी विद्यार्थीहरुले निर्मलालाई न्याय दे, तत्काल बलात्कारी र हत्यारालाई सार्वजनिक गर भन्दै चर्का नाराबाजीसहित प्रदर्शन गरेका थिए ।
कार्यक्रमलाई सम्बोधन गर्दै अखिल (क्रान्तिकारी) का नेतृ तारा सन्ज्यालले तीन वर्षसम्म पनि दोषी पत्ता नलाग्नु राज्यको गम्भीर कमजोरी रहेको भन्दै आक्रोश व्यक्त गरिन् । निर्मला पन्तको हत्या पश्चात् हजारौं बलात्कार र सयौं बलात्कार पछि हत्याका घटना घटेको र कसैले पनि न्याय नपाएको र राज्य निरीह बनेको भन्दै दलाल संसदीय व्यवस्थामा महिलाहरुको सुरक्षाको ग्यारेन्टी नहुने बताइन् । सरकारले पूरै अपराधी संरक्षण गरेको र पीडितलाई झन् पीडा थपिएको भन्दै नेतृ सन्ज्यालले निर्मला पन्त लगायत सम्पूर्ण बलात्कारी र हत्याका दोषी सार्वजनिक गरी फाँसीको सजाय माग गरिन् ।
बहुचर्चित निर्मला काण्डका बलात्कारी र हत्यारा अहिलेसम्म पनि पत्ता लागेको छैन । तीन वर्ष पहिले श्रावण १० मा बलात्कारपछि हत्या गरी उखुबारीमा मृत अवस्थामा भेटिएकी थिइन् ।
