इलाम : नेपाल कम्युनिस्ट पार्टी इलामले सडक निर्माण र मर्मतकार्यमा आफ्नो जनशक्तिलाई परिचालन गर्दै जनश्रममा जुटेको छ ।
कोरोनाको महामारीलाई चिर्दै नेकपाले जिल्लाका विभिन्न स्थानमा जनश्रमदान जारी राखेको छ । पार्टीका जिल्ला सचिव मौसमको नेतृत्वमा जनश्रमदान भैरहेको जानकारी नेकपाले दिएको छ ।
जिल्लाको रोङ गाउँपालिका १ स्थित सडक निर्माणकार्य अलपत्र भएपछि स्थानीय बासिन्दाले बाटो निर्माणमा पहल गरिदिन पार्टीसँग अनुरोध गरेका थिए ।
पार्टीले स्थानीय जनताको आवश्यकताअनुरूप काम गरिरहेको जिल्ला इन्चार्ज सुमनसिंह पौडेलले बताए । आफ्नो पार्टीका जनसेवकलाई श्रममा पनि लगाउने र स्थानीय निकायलाई समेत द्रुत गतिमा काम गराउन पहल गरिने उनले बताए ।