सैन्य कारबाहीको प्रतिरोध गरिरहेका यमनका हुतु विद्रोहीहरूले प्रधानमन्त्री मीन अब्दुल मलिकमाथि नै आक्रमण गरिदिएका छन् । एडन विमानस्थलमा प्रधानमन्त्री र मन्त्रिपरिषद् सदस्यहरूलाई लक्षित गरी भएको आक्रमणमा २२ जनाको मृत्यु भएको छ । आक्रमणमा ५० भन्दा बढी घाइते भएका छन् । द्वन्द्वग्रस्त यमनका नवनियुक्त मन्त्रीहरू सवार विमान अरेबियाबाट आएर अवतरण गरेको केहीबेरमै विस्फोट भएको बीबीसीले जनाएको छ ।
सहायतामा जुटेकाहरू पनि घटनामा हताहत भएको जनाइएको छ । त्यहाँका प्रधानमन्त्री मीन अब्दुल मलिकले भने आफू र मन्त्रिपरिषद् सदस्यहरू ‘सकुशल’ रहेको बताएका छन् ।
यमनको समाचार वेबसाइट अल मस्दरको भनाइ उद्धृत गर्दै बीबसीले जनाएअनुसार श्रम मन्त्रालयका उपसचिव मारिएको र दुईजना उपमन्त्री घाइते भएको जनाएको छ ।
सूचनामन्त्रीले भने हुती विद्रोहीहरूले कायरतापूर्ण आतङ्कवादी कार्य गरेको आरोप लगाएका छन् ।
बीबीसीको भीडीओ फुटेजमा यात्रीहरू उत्रिँदै गरेको बेला ठूलो विस्फोट भएको देखिएको छ । मन्त्रीहरूको स्वागतका लागि पुगेको भीड एयरपोर्ट टर्मिनलबाट बाक्लो धुवाँ निस्किएको देखेपछि भागेका थिए । त्यसको केही समयमै बन्दुक प्रहारको आवाज सुनिएको थियो । त्यहाँ कम्तीमा दुईवटा विस्फोट भएको जनाइएको छ ।
साउदी अरेबियाले नेतृत्व गरेको अरब राष्ट्रहरूको समूहले हुती विद्रोहीहरूलाई परास्त गर्न र राष्ट्रपति अब्दराबा मन्सुर हादीको शासन स्थापित गर्न सैन्य कारबाही सुरु गरेसँगै यमनमा फेरि आक्रमणका घटना बढेका छन् ।
सन् २०१५ देखि यमन द्वन्द्वको चपेटामा परेको छ । त्यहाँ द्वन्द्वले अहिलेसम्म एक लाख दस हजारभन्दा बढीले ज्यान गुमाइसकेका छन् ।
एजेन्सीहरूको सहयोगमा
