काठमाडौँ —पत्नीहत्याको अभियोगमा जेल सजाय भुक्तान गरिरहेका पूर्वडीआईजी रञ्जन कोइरालालाई बाँकी कैद सजाय छुट दिने फैसला पुनरावलोकनका लागि परेको निवेदन सुनुवाई हुँदैछ । सर्वोच्च अदालतले पुर्व डी आईजी कोइरालालाई सावन ८ गते जेल मुक्त गरेपछि फैसला पुनरावलोकन गर्न परेको निवेदनमाथि आइतबारका लागि तोकिएको पेशीमा न्यायाधीशहरु बम कुमार श्रेष्ठ, प्रकाशकुमार ढुंगाना र कुमार रेग्मी सदस्य छन् । तीन सदस्यीय उक्त इजलासले सरकारका तर्फबाट पेस भएको निवेदनको सुनुवाइ गरी फैसला पुनरावलोकन हुने वा नहुने आदेश गर्नेछ ।
सर्बोच्च अदालतको ८ सावनको उक्त फैसला चौतर्फी आलोचित बनेपछि पुनरावलोकनका लागि सोही दिन निवेदन दर्ता भएको थियो । निवेदन दर्ता हुनासाथ चौतर्फी आलोचना र बिरोधपछि सर्वोच्च अदालतले तत्काल सुनुवाइको मिति तोकेको थियो । प्रधानन्यायधीश चोलेन्द्रशमशेर जबराले चौतर्फी अदालतको काम कार्वाही राम्रो भएको देखाउनको लागि पनि निवेदन दर्ता भएको २ दिन पछि नै सुनुवाईको मिति तोकेका छन् । सर्बोच्च अदालतमा पुनरावलोकनको निवेदनमाथि सुनुवाइका लागि यति छिटो पेसी तोकिएको सम्भवत यो पहिलो घटना हो । पुनराअवलोकनका लागि दर्ता गरिएको निवेदनमा फौजदारी कसुर सजाय निर्धारण ऐनमा अपराध सावित नभई कैद सजाय घटाउन नहुने ब्यवस्थाको उलंघन गरिएको भन्दै अदालतमा प्रयाप्त आधार र प्रमाणहरु हुदाहुँदै पनि सहायक कारणहरुमा जोड दिइएको भन्ने भन्ने कुरा उल्लेख गरिएको छ।