काठमाडौँ : स्थानीय जप्रतिनिधिहरूले नगरपालिकालाई प्राइभेट कम्पनीजस्तो बनाएर चलाएको भन्दै नेपाल कम्युनिस्ट पार्टी अछामले डोजरे जनप्रतिनिधिहरूलाई कारबाही गर्ने चेतावनी दिएको छ ।
नेपाल कम्युनिस्ट पार्टी अछाम पञ्चदेवल विनायक नगर समिति इन्चार्ज किशोरले प्रेस विज्ञप्ति जारी गर्दै अछाममा जनतप्रतिनिधिहरूले गाउँगाउँमा डोजर आतङ्क फैलाएको भन्दै प्रदेशबाट विनियोजित बजेटको सरकारी नेकपाका कार्यकर्ता पोस्ने र नेताहरूको घडेरी किन्नेबाहेक अरू कुनै लक्ष्य नभएको बताएका छन् ।
आफ्ना कार्यकर्ताहरूलाई योजना दिएर कमिसन खाने भ्रष्टाचारी प्रवृत्ति खुलेआम रहेकाले कामै नभएका र आधा काम भएका केही योजनाहरूको विवरण सार्वजनिक गर्ने नेकपाले बताएको छ ।
सरकारी नेकपाले जनताको विकासमा अवरोध पुर्याउने उद्देश्यले बेमौसमी आन्दोलनको बाजा बजाएको र आफूले मागेको रकम नगरपालिकालबाट विनियोजित नभएपछि आन्दोलनको हौवा पिटिएको विज्ञप्तिमा उल्लेख छ ।
जिल्लाको पञ्चदेवल विनायक नगर समिति २ का अध्यक्ष पदमबहादुर धामीका हत्यारा पत्ता लगाउन नसकेको उल्लेख गर्दै विज्ञप्तिमा धामीका हत्यारा पत्ता लगाई कानुनी कारबाहीका लागि पहलकदमी लिन नगरपालिकालाई आग्रह गरिएको छ ।
यस्तै विज्ञप्तिमा कोरोना रोकथामको बहानामा जनस्वास्थ्यको क्षेत्रमा अनियमितता भैरहको भन्दै कोरोनाविरुद्धको मोर्चामा अग्रभागमा रहेर काम गर्ने स्वास्थ्यकर्मीको अनिवार्य बिमा गर्न, नगरपालिकामा एम्बुलेन्सको व्यवस्था गर्न र नगरपालिकाभरका वृद्ध, बालबालिका, गर्भवती महिला र दीर्घरोगीको तुरुन्तै पीसीआर जाँच गर्न माग गरिएको छ ।
केही वित्तीय संस्थाहरूले बन्दाबन्दीको बेला ब्याजसमेत असुल गरिरहेको उजुरी आफ्नो पार्टीमा परेकाले जनताको रकम फिर्ता गर्न मागसहित जनहितविपरीतका गतिविधिमा संलग्न संस्थालाई कडा कारबाही गर्ने चेतावनी विज्ञप्तिमार्फत दिइएको छ ।