जेल

गीत

जेलका काला पर्खालसँग हार्नु हुँदैन
संसार मुक्त गर्ने अठोट मार्नु हुँदैन ।

जेलकै छानामुनि कयौँ योद्धा हुर्किन्छन्
जेलभित्रै कयौँ महानायक जन्मिन्छन्
जेलभित्रै जेललाई जित्न सक्नुपर्छ
अँध्यारोमै उज्यालो देख्न सक्नुपर्छ
जेलका काला पर्खाल…

कहिले छाउँछन् निराशाका काला बादलहरू
कहिले आउँछन् बेइमानीका गन्धे लालचहरू
विचलनका आँधी–तुफान छेक्न सक्नुपर्छ
सङ्घर्षमै सुन्दर जीवन देख्न सक्नुपर्छ ।
जेलका काला पर्खाल…

समानताको हाम्रो बिहान पक्कै उदाउनेछ
धर्तीभरि न्यानो–न्यानो खुसी सजाउनेछ
एक दिन जेलका काला पर्खाल सबै ढालिनेछन्
अत्याचारका खुनी जन्जिर सबै फालिनेछन् ।

जेलका काला पर्खाल…

२०७६ साउन १६ गते बिहीबार प्रकाशित

प्रतिक्रिया दिनुहोस्