काठमाडौं : नेपाल कम्युनिस्ट पार्टीले बैशाख २२ गते शनिबारका लागि आह्वान गरेको नेपालबन्दको पूर्वसन्ध्यामा शुक्रबार साँझ देशका विभिन्न ठाउँमा मशाल जुलुस निकालिएको छ ।
चितवनको टाँडी, रुपन्देहीको बुटवल मिलनचोक र भैहरवा, झापा, दाङ घोराहीको क्याम्पसरोेड,
सल्यानको बाघचौर, कैलालीको सुखड र टिकापुरमा, रोल्पाको सुकिदह, प्युठान, नवलपरासीको कावासोती र गैडाकोट, रुकुमलगायतका ठाउँहरुमा साँझ मशाल जुलुस निकालिएको छ ।
यस्तै कास्कीको पोखरा, महोत्तरीको बर्दीबास, सुनसरीको इटहरी लगायत देशका विभिन्न ठाउँमा नेकपाका शुभचिन्तक सर्मथक र स्थानीय युवाहरुले मशास जुलुस निकालेका छन् ।
सरकारले नेकपाका नेताकार्यकर्ताहरुलाई पक्राउ गरेर बेपत्ता बनाएको, झुट्टा मुद्दा लगाउने गरेको भन्दै बैशाख २२ गते नेपालबन्दको आह्वान गरिएको छ । उक्त बन्दको समर्थन र सरकारी हस्तक्षेपको विरोधमा देशव्यापी जुलुुस निकालिएको हो ।
यसैविच नेपालबन्दको समर्थनमा मशाल जुलुस निकाल्ने क्रममा प्रहरीले विभिन्न ठाउँमा नेकपाका कार्यकर्ता, समर्थक शुभचिन्तकहरुलाई पक्राउ गरेको बताइएको छ ।
जसअनुसार चितवनका प्रदिप लामा सहित अर्को एकजना र प्युठानमा जिल्ला इन्चार्ज चिन्तामणि र केशवलाई पक्राउ गरिएको बताइएको छ ।
२०७५ वैशाख २१ गते शुक्रबार ९ : ५० मा प्रकाशित