काठमाडौँ
नेपाल आयल निगमले २०७९ माघ २३ गते राती १२ः०० (बाह्र) बजेबाट लागू हुने गरी इन्धनको मूल्य फेरि बढाएको प्रति नेपाल कम्युनिस्ट पार्टी (बहुमत) ले निन्दा र भत्र्सना गर्दै यसखाले जनविरोधी कार्यको सशक्त विरोध गर्न आमजनतालाई अपिलसमेत गरेको छ ।
पार्टीका प्रवक्ता सुदर्शनले मङ्गलबार विज्ञप्ति प्रकाशित गरी नेपाल आयल निगमले २०७९ माघ २३ गते राती १२ः०० (बाह्र) बजेबाट लागू हुने गरी इन्धनको मूल्य फेरि बढाएको प्रति निन्दा र भत्र्सना गर्दै यसखाले जनविरोधी कार्यको सशक्त विरोध गर्न आमजनतालाई हार्दिक आह्वान गरेका हुन् ।
विज्ञप्तिमा भनिएको छ, ‘नेपाल आयल निगमले हिजो राती १२ः०० (बाह्र) बजेबाट लागू हुने गरी इन्धनको मूल्य फेरि बढाएको छ । मूल्य वृद्धिको कारणबारे पुरानै तर्क ‘नेपाल सरकारलाई ऋण तिर्नुपर्ने’ तथा ‘इन्डियन आयल कर्पोरेसनलाई बक्यौता तिर्नुपर्ने’ बताइएको छ । इन्धनको मूल्य वृद्धिले समग्र क्षेत्रको मूल्य वृद्धिमा सबैभन्दा बढी प्रभाव पार्ने भएकाले पछिल्लो समयमा आमजनताको दैनिक जीवन महँगीको भारले अचाक्ली थिचिएको छ ।’
विज्ञप्तिमा अगाडि भनिएको छ, ‘अन्तर्राष्ट्रिय बजारमा इन्धनको मूल्य बढ्दा बढाउने र घट्दा घटाउने ‘स्वचालित नियम’ विपरीत नेपाल आयल निगमले गरेको यो पछिल्लो मूल्य वृद्धि सातौँपटकको हो । खरिद मूल्यको तुुलनामा करिब १०० प्रतिशतको हाराहारीमा गरिएको मूल्य वृद्धि कालोबजारीको एक चरम नमुना हो । बर्सौैंसम्म एउटै कारण बताएर पटकपटक मूल्य वृद्धि गरिरहनु र जतिपटक मूल्य बढाए पनि ऋण चुक्ता कहिल्यै नहुनुको रहस्यका बीच नेपाल आयल निगमभित्रको चरम भ्रष्टाचार एवम् त्यसमा सरकार तथा ठूला राजनीतिक दलहरूको संलग्नता ‘ओपन सेक्रेट’ विषय हो । हाम्रो पार्टी यसखाले जनघाती, राष्ट्रघाती कार्यको निन्दा गर्दछ । नेपाल सरकार तथा नेपाल आयल निगमलाई यथाशीघ्र ‘स्वचालित नियम’ लागू गर्न तथा खरिद मूल्यका आधारमा अधिकतम २० प्रतिशत नाफा कायम गरी नयाँ मूल्य तोक्न पार्टी जोडदार माग गर्दछ । यसखाले जनविरोधी कार्यको सशक्त विरोध गर्न पार्टी आमजनतालाई हार्दिक अपिल गर्दछ ।’
