दाजुभाइ विदेशतिर शून्य छ है गाउँघर
के रमाइलो छ र यहाँ तीज बरी लै
…
संस्कृतिको नाममा यहाँ भित्रिँदैछ विकृति
सभ्यता नाङ्गिएर बिजोक बरी लै
कामको खोजीमा युवा पलायनले देश रित्तिइरहेको समयमा लक्ष्मी गौतमको तीजको गीतले युवाहरूलाई अरूको भर नपरी देश फर्कन र संस्कार जोगाउन आह्वान गरेको छ । तीजको नाममा जेठ– असारदेखि नै समाजमा राँको लिएर सुरु हुन थालेको विकृति र रक्सी र बियरमा डुब्ने पाश्चात्य छाडा संस्कारको विरोध गर्दै लक्ष्मीले तीज गीतमा भनेकी छिन् :
गाउँघर जोगाउँदै सिङ्गो देश बचाउन
फर्कन परदेशी घर बरी लै
लक्ष्मी गौतमको शब्द, लय र स्वरमा आएको तीजी गीतको भिडियोले विकृत तीज र वर्तमान समाजको तीतो यथार्थलाई पनि प्रतिबिम्बित गरेको छ । हातमुख जोर्ने समस्याले प्रायः युवाहरू र विशेषगरी दाजुभाइहरू (पुरुषहरू) अरबको खाडी र संसारका विभिन्न देशमा भौँतारिइरहेको अवस्थामा देशमा चेलीले मनाउने तीजको खासै रौनक नभइरहेको यथार्थ गीतमा देख्न पाइन्छ । युवा पलायनका कारण उत्पन्न समस्यालाई लक्ष्मीले तीजको गीतमा यसरी समेटेकी छिन् :
धान झुल्ने खेतभरि कोदो फल्ने बारीमा
बनमारा झाङ्गिएर बिजोक बरी लै
युवाशक्ति बिदेसिएपछि खेतबारीमा बनमारा झाँगिएको तीतो यथार्थ सबैले बेहोरिरहेको सत्य हो । लक्ष्मीको तीज गीतमा समाजबाट सभ्य संस्कृति संस्कार हराउन थालेको र विदेशी असभ्य संस्कृति मौलाउन थालेकोमा चिन्ता पनि छ । उनले देश निर्माण गर्ने युवाशक्ति विदेशीको भर परेकोमा धेरै गुनासो गरेकी छिन् । रुविसा अधिकारी र लक्ष्मी स्वयम्को समेत अभिनय रहेको ‘तुना कसेर’ ले तीजको सन्दर्भमा नयाँ स्वाद पस्केको छ । ‘पोइला जान पाम’ जस्ता विकृत गीतहरूले जनमानसको मस्तिष्क भ्रष्ट बनाइरहेको अवस्थामा सभ्य संस्कृतिको निर्माण र रक्षामा जोड दिने लक्ष्मीको प्रगतिशील तीज गीत एकपटक सुन्नै र हेर्नैपर्ने प्रकृतिको रहेको छ भन्दा अन्यथा हुँदैन । दलाल सत्ताको अचाक्ली दमन– हत्या र हिंसा बढिरहेको समयमा त्यतातिर पनि केही सङ्केत गर्न र हत्या संस्कृतिको विरोध गर्न सकेको भए गीत अझै प्रभावकारी बन्ने थियो भन्ने अपेक्षा भने गर्न सकिन्छ ।
२०७६ भदौ ३ गते मंगलबार प्रकाशित